/p. 368/ DIALOGUS LI.
De apparitionibus in aëre
Alex. –
Cur armatos et belligerantes equites
in aëre aliquando apparuisse historiarum
monumenta testantur?
I. C. – An potius fabulosas istas irridebimus
narratiunculas a Principibus confictas,
ut rusticanae plebeculae timorem
incuterent? Alex. – At quomodo ista confingi
potuere? I. C. – An simplici Regum depositione
de visu, ut legulei loquuntur, quemadmodum
(ut a Nicolao Machiavello relata
exempla subticeam) Numa Pompilius et Romulus
Deos vidisse apud populum praedicabant,
a quibus legum sanctiones accepissent;
et Maximini exercitus Dux, ut se suosque milites
in Aquileiensi pugna ob ignaviam victos
atque fugatos excusaret, vociferabatur
a se visum Divum Apollinem pro Aquileiensibus
fortissime dimicantem? an dormientes subditos
Principes curarunt fascinandos? Cenethus,
Scotorum Rex, cum non valeret Alpini
patris in bello a Pictis interfecti ultionem
subiectis timore perculsis persuadere,
Regni Proceres in Aula Regia perhumaniter
excepit et hospitio convivioque dignatus est.